صورتي
القاهرة, Egypt
http://www.goodreads.com/mennafawzi اول تجربة نشر من مدونتي رواية "في أرض الحلم" في المكتبات الان

جميع حقوق النشر محفوظة وغير مسموح بالنقل !
سيتم نشر اسم و لينك الحرامية في قسم "امسك حرامي"

"حبيبة في ارض الحلم".. قصة رومانسية طريفة علي حلقات .(تم حذفها.. موجودة كاملة في كتاب " في أرض الحلم " في المكتبات)

حقوق الملكية يا حرامي!

الاثنين، 29 أغسطس 2011

الاخ المُتحرش

عزيزي الاخ المُتحرش عندي ليك كام سؤال..

خلينا ننسي اللي فات و نفتح صفحة جديدة.. مش هتكلم عن اللي عملته قبل كده.. هسألك عن اللي جاي.. احنا عملنا ثورة ووقفنا لجان شعبية و حمينا بيتونا واهلينا ..

ممكن تفسرلنا دلوقتي انت ليه ممكن تتحرش بواحدة؟

1- عشان تتسلي مع اصحابك مثلا؟
 مش هسألك طبعا مفكرتش تأثير حاجة زي دي علي البنت هيكون ايه.. لأنك لو فكرت اكيد مكنتش عمرك هتعمل كده.. انما سؤالي هو.. هتسسترجل نفسك؟! بعد ما بقي في دلوقتي مجموعات  منظمة من الشباب الجدعان واقفين عشان يحموا البنات من المُتحرشين اللي انت و احد منهم.. مش حاسس انك نفسك تبقي معاهم؟ موقفهم هم ارجل و اجدع ..صح؟  مانفسكش البنات اللي ماشية بدل ما تشتمك و تخاف منك.. تبصلك بانبهار .. و تحس انك بطلها اللي بيحميها؟ طب كلمة بيني و بينك.. كده البنات هي اللي هتجري وراك..

2- عشان البنت لابسة لبس - ايا كان- بس في نظرك انت مش محترم، و تستحق اللي يجرالها؟
طب احكيلي كده.. تجروء تمد ايدك علي واحدة في بلد اجنبية برة مصر؟ و ما ادراك بأة الاجانب بيلبسوا ايه.. اشمعني دول بتعرف تمسك نفسك عنهم.. اقولك ليه؟ عشان هناك في قانون رادع و عارف انك "هتتمرمط" لو اتحرشت بحد.. طب بالذمة مش مكسوف من نفسك وانت جبان هناك، وجاي هنا تتشطر علي بنات بلدك لمجرد ان هنا مفيش حد بيحميهم؟؟ 
ثم ان اصلا فكرة تبريرك للتحرش بطريقة لبس البنت عامل بالظبط زي لما تبقي محفظتك طالعة من جيبك فتغري الناس انها تسرقك.. مش معني ان انت مخبتش محفظتك كويس.. ان الحرامي اللي سرقك عنده عذر او تبرير.. في الاخر هو حرامي واعتدي علي حقك وانت الضحية..
البنت حرة تمشي بأي لبس.. حتي لو كان مش عاجبك..هي ليها ربنا يحاسبها و اهل يعاتبوها.. او حتي لو ملهاش دي مش قصتك انت.. متبصش عليها و لا تمد ايدك (اعتبر كده في قانون رادع زي بلاد برة).. وإلا تبقي زي حرامي المحفظة.. 

3- عشان انت فاض بيك من الحرمان و مش قادر تستحمل؟
طب وبتعوض حرمانك بالتحرش؟ هل يا تري ده بيسد حاجتك الملحة؟ بصراحة اشك..
طب البنت اللي انت بتؤذيها نفسيا قبل بدنيا ذنبها ايه؟.. مش هقولك الكلام بتاع ترضي كده لاختك اوامك او مراتك فالمستقبل.. لأني عارفة و متأكدة انك مترضاش.. بس عارفة و متأكدة برضه انك زي مانت بتعمل .. هيتردلك! 
اتق الله! ولو مش خايف من ربنا .. خاف علي اهل بيتك من انه يترد فيهم.. ولومش خايف من ده و ده..
يبقي انت مفيش فايدة فيك و تستحق اللي هيحصلك.. لما المرة الجاية ايدك تتمد علي واحدة.. خلي بالك البنات دلوقتي مش هتسكت تاني.. بقوا عارفين حقوقهم واتعلموا يتصرفوا ازاي مع امثالك.. 


هناك تعليق واحد: